Силен земјотрес со епицентар во Леуново го стресе полошко

Утро со страв и вознемиреност за граѓаните во полошко. Силен земјотрес со јачина од 5 степени по рихтеровата скала го стресе регионот. Сеизмолошките станици го лоцираа епицентарот во мавровското село Леуново, на длабочина од околу 8,5 километри. По јакиот земјотрес во 4 часот и 54 минути следуваа неколку потреси со послаб интензитет. За среќа, нема повредени, ниту жртви и не се пријавени материјални штети. 

„Утрово во 4.54 минути се почувтсвува силен земјотрес, кој беше 5 степени, населението очигледно е растревожено и сите се разбудија. Стапив во контакт со полициската станица во Маврово, подружницата на Македонија пат како и со сопствениите на поголемите објекти во мавровскиот регион. Од она што го слушнав од нив, нема човечки жртви, повредени ниту некои материјални штети. Фала му на Господ се помина добро. Леуново, каде беше епицентарот  е село со околу 30 постојани жители и до сега нема пријавено ниту таму поголема штета.“, рече градоначалникот Медат Куртовски.

Единствено како последица на силниот земјотрес заматена е водата во водоводната мрежа во мавровскиот регион. Од општината и јавното комунално претпријатие им препорачуваат на граѓаните деновиве да не пијат вода од чешмите.

Според официјалните сеизмолошки податоци земјотресот најсилно бил почувствуван во Гостивар и Маврово со пет степени, во Тетово и Скопје со четири степени, а во Битола, Прилеп и околината со три степени според Европската макросеизмичка скала.  Земјотресот бил почувствуван и во соседна Албанија. 

error: Content is protected !!