Слобода на медиумите во време на пандемија

Постојано на терен и меѓу луѓе. Задача на новинарите е секогаш навремено и транспарентно да ги известуваат граѓаните, одговорно да ги пренесуваат информациите. Со самото тоа, тие се често изложени на ризици, особено сега во време кога светот се соочува со пандемија од коронавирусот. 3 мај се одбележува како ден на слободата на медиумите, но колку навистина медиумите се слободни? На таа тема разговаравме со колегата Александар Самарџиев.

„Новинарите се соочуваат со низа предизвици, да почнеме од проблемите со работните односи, ризикот на кој се изложени, се со цел да ги информираат граѓаните. Се соочуваат со најразлични притисоци, со кои треба секојдневно да се борат“, вели Самарџиев.

Кога повеќето луѓе седат дома, новинарите се на терен. Нивна обврска е да ги информираат граѓаните за секоја ситуација, а сега и за најновите податоци за состојбата со коронавирусот. На тој начин ризикуваат и тие да бидат заразени.

„Постојано сме меѓу луѓе, на најразлични места, во болниците, сега кога ситуацијата е таква каква што е. Можеби новинарите треба да имаат и бенефициран стаж со оглед на ризикот на кој се изложени. Сега, со пандемијата, голема е можноста и самите новинари да се заразат, па потребна е поголема заштита“, смета Самарџиев.

Потребна е и регулација на таканаречените „сиви зони“ во новинарството, смета Самарџиев. Слободата на медиумите е еден клучен дел од секоја демократска држава, а кризните моменти како изминатиов период со пандемијата, дополнително не потсетуваат на тоа.

error: Content is protected !!