Собирале лажни донации во име на здружение за помош на болни деца

Здружение за поддршка на деца болни од рак реагира дека во Гостивар во нивно име се собираат лажни донации. Девојки низ кафулиња продавале сликовници, наводно за помош на болните дечиња.

За случајот алармираа од Здружението САНО, невладина организација насочена кон помош на родители и деца, кои се лекуваат на хемато- онколошкото одделение на детската клиника во Скопје. Вчера им било јавено дека женски лица низ кафулиња во Гостивар, претставувајќи се како нивни волонтери продаваат сликовници, наводно за да собираат пари за болните дечиња.

„Најостро демантираме дека наши волонтери продаваат било какви сликовници за донации. Сметаме дека тоа е недостоинствен начин, и не е начин на кој треба да им се помогне на децата кои боледуваат од оваа болест и се лекуваат на клиниката. Апелирам до сите граѓани на Гостивар, да обрнат внимание, да не дозволуваат да се злоупотребуваат нивните средства и желба да се помогне на овие деца.“, вели Марија Тасев, претседател на Здружението.

Претседателката на здружението вели дека случајот ќе го пријават до надлежните служби, штом ги добијат сликовниците за кои им е речено дека се продаваат со нивното име. Сликовниците, кои наводно требало да послужат за хуманитарни цели девојките ги продавале по цена од 100 и 150 денари.

error: Content is protected !!