Средните училишта во Гостивар се подготвуваат за уписи според протоколот за заштита

Средните училишта во Гостивар ги вршат подготовките за спроведување на уписите за полуматурантите, според Протоколот за заштита од коронавирус. Оваа година запишувањето нема да биде како вообичаено, поради пандемијата на Ковид 19, туку со строги мерки како дезинфекција, носење маски, држење растојание и слично. Училишните управи уверуваат дека ќе се запазат правилата во протоколот за да се овозможи целосна заштита на учениците и на членовите на уписните комисии.

„На влезот ќе има луѓе одговорни за воспоставување на ред за да се не создаваат гужви, задолжително е сите да носат заштитни маски, да се одржува социјална дистанца. Ќе има јасно истакнати препораки кои мерки треба да се преземат. Ние сме подготввени да го спроведеме протоколот во целост и ги повикуваме родителите и учениците да се придржуваат до тоа.“, рече Тони Ефремоски, директор на средното економско училиште.

За спроведување на протоколот и мерките на заштита се подготвуваат и во гостиварската гимназија, каде се отворени места за прием на 476 ученици.  

Инаку, според конкурсот на Министерството за образование, во четирите средни јавни училишта во Гостивар, има вкупно 1.938 слободни места за упис на полуматуранти. Првиот рок за пријавување ќе се спроведе на 16 и 17 јуни, а резултатите ќе бидат објавени веќе следниот ден.

error: Content is protected !!