Стефан: Сакам да направам светски рекорд во местење Рубикова коцка

Очигледна е вештината и брзината со кои овој 12 годишник успева да ја намести Рубиковата коцка. За да докажеме, снимателот ја размести коцката, а ние се уверивме во талентот на младиот Стефан од Тетово. Тој е ученик во основното училиште „Братство Миѓени“ – од својата седма година се заинтересирал за ова хоби.

„Започнав од 7 години. Гледав едно видео други луѓе како местат Рубикова коцка и ми беше интересно. Прво не можев да ја наместам, ама се трудев и на крајот успеав за многу брзо време да ја наместам“, вели Стефан Ѓорѓески.

Поддршка најмногу добива од родителите. Тие вложуваат време и труд за да го носат на натпревари. Неговата мајка вели дека благодарение на разбирањето од страна на работодавецот, успева да одвои време за сите заедно да одат на натпревари. Она што недостига е клуб во Тетово – место каде што ваквите деца ќе инвестираат во својот талент.

„На почетокот не мислевме дека ќе се заинтересира до толку за ова хоби. Ама со тек на време, почна многу брзо да ги мести коцките, па ни стана интересно. Самиот ни кажа за натпревар во Скопје – го однесовме, постигна солиден резултат, па бевме на уште еден, па тогаш постигна одличен резултат, за негова возраст – во една рунда успеа за 11 секунди. Но, тешко е, нема клуб нема ништо во Тетово за ова хоби, за се мора да одиме во Скопје“, вели Валентина Ѓорѓеска мајка на Стефан.

Откако ни ги покажа сите коцки и успеа да ги намести сите за многу брзо време, Стефан ни кажа која е неговата желба.

„Би сакал да постигнам светски или барем национален рекорд во брзина на местење Рубикова коцка, на пример за 5 секунди“.

error: Content is protected !!