Таравари: Ќе се врши дезинфекција на влезови во поголемите станбени згради

Општина Гостивар со јавните претпријатија ќе организира чистење и дезинфекција на влезови и ходници во колективни згради, како мерка против ширење на коронавирус. Предлогот дојде од градоначалникот Арбен Таравари на денешниот состанок на Кризниот штаб. Се разгледува можноста и за поставување на пунктови за дезинфекција на возила на влез и излез од градот.

„Предложив да започнеме да ги чистиме јавните простори на поголемите колективни згради, значи скалите и ходниците. Се надевам дека оваа недела Јавното претпријатие за паркови и зеленило ќе започне со оваа активност. Секако дека не можеме да стигнеме во сите згради, но ќе се обидеме да опфатиме колку што можеме повеќе во овој период, па потоа ќе продолжиме со другите згради. Исто така, ќе направиме напор на влезовите и излезите од територијата на општината да поставиме луѓе на пунктови за дезинфекција на возилата“, изјави градоначалникот.

Официјално до денес до 12 часот, во Гостивар нема нов потврден случај на коронавирус, што значи дека подрачјето останува со еден заболен, кој беше регистриран на 19 март.

Кризниот штаб ја оцени состојбата како стабилна и донесе неколку заклучоци за превенцијата и мерките за заштита на населението од вирусот: Да се почитуваат препораките на Владата, сите грашани, а особено постарите да избегнуваат непотребно движење и сл.

error: Content is protected !!