Тројца вработени во болницата во Гостивар позитивни на корона

Во изминатото деноноќие на гостиварското подрачје нема нови случаи на коронавирус. Од новозаболените 4 пациенти регистрирани во текот на викендов, тројца се медицински лица од општата болница во Гостивар.

Информацијата ја потврди директорот на болницата Јакуп Јакупи. Заболените медицинари се на домашно лекување, и до сега немаат развоено симптоми. За уште 6 лица медицински персонал се чекаат резултати.

„Ние континуирано преземаме неопходни мерки за заштита на персоналот и пациентите. Вработените кои имаат позитивни резултати, за среќа не оделе на работа во болницата изминатиот период, со оглед дека воведовме работа во групи, за да се избегнат меѓусебни контакти. Тие остануваат на лекување во домашни услови и до сега немаат развиено симптоми. Деновиве ќе им се изврши и ретестирање. Резултати се чекаат за уште шест вработени во болницата, кои исто така во меѓувреме заради сигурност се во самоизолација.“, информираше Јакупи.

Состојбата со коронавирусот во регионот на Гостивар се разгледуваше на состанок на Кризниот штаб. Се уште се оценува како стабилна, но истовреме и сериозна. Од граѓаните се бара внимателност и следење на препораките за заштита.

Со заболените медицински лица е извршена епидемиолошката анкета која треба да утврди како се заразиле со вирусот. Во болницата била спроведена дезинфекција, а одделенијата продолжуваат да функционираат непречено.

Општината од денес испраќа комунална екипа која цело време ќе биде ангажирана за хигиената во кругот на болницата.

error: Content is protected !!