Угостителите први на удар заради коронавирусот

Празни маси и изгасени светла. Ваква е сликата во угостителските објекти во Тетово. Повеќе од еден месец рестораните и кафулињата се затворени. Угостителите беа првите од кои се бараше целосно да ги затворат своите објекти. Велат се соочуваат со навистина тежок период, бидејќи нивниот опастанок зависи од луѓето и нивната посета.

„Ние веднаш бевме затворени, тоа беше една од првите мерки. Приходи немаме никакви, а трошоците и сметките треба да се платат. Вработените чекаат плата, треба да с еплати струја, вода и останато. Прашање е дали угостителот успеал во првите денови од месец март да заработи доволно за да ги плати сите тие трошоци“, вели Ненад Петровиќ, сопственик на ресторанот „Бела Миа“ во Тетово.

Кредитите кои беа најавени како мерки не се гаранција за успешно продолжување на бизнисот, велат угостителите. Колку ќе можат клиентите да трошат, а колку угостителите да функционираат со полни капацитети.

„Сите сме потрошени. Неизвесно е дали граѓаните ќе можат да си дозволат да трошат во ресторани, а угостителите да заработат доволно за да си ги исплатат трошоците. Кредити се добра инјекција за мало освежување на бизнисот, но тие треба да се враќаат“, истакнува Петровиќ.

Работењето со половина капацитет, кое се најавува за средината на мај, значи и ангажирање на помалку вработени. Финансиската помош која се нуди е доволна само за еден месец, а не за соодветно продолжување на угостителската дејност, сметаат угостителите.

„Финансиската помош која ја ветија би била доволна само за еден месец за исплаќање на платите од вработените. Но, како ќе продолжиме понатаму со угостителската дејност? Се надевам дека ќе имаме поддршка и дека нема да бидеме оставени сами на себе, бидејќи ова е навистина проблематичен и тежок период за нас“, вели Љубиша Јованоски, сопственик на пабот „Викториан“ од Тетово.

Најголем дел од угостителските објекти во Тетово се под кирија – дополнително отежнување за дејноста. Угостителите се надеваат дека со поддршка од државата, ќе успеат повторно да го вратат стариот сјај и дека овие празни маси и столици, наскоро ќе бидат исполнети со луѓе.

error: Content is protected !!