Урбаната опрема во паркот во Гостивар е мета на вандали

Клупите, кантите за отпад и другата урбана опрема во големиот парк во Гостивар, честопати се мета на несовесни граѓани. Од јавното претпријатие кои се задолжени за одржување на градското зеленило, велат дека наутро наоѓаат искорнети и расфрлени корпи, иако истите се бетонирани и зацврстени со метален држач. Таква била глетката секое утро во претходните неколку дена во горниот дел од паркот, што е близу до стадионот.

Повеќе корпи за ѓубре биле турнати на земја, а некои од нив и запалени. Од претпријатието велат дека им се нанесуваат големи штети и апелираат вандализмот да престане.

„Секое утро вработените наоѓаат демолирани корпи, па ги враќаат на место, ги санираат, но потоа истото се повторува. На претпријатието му се нанесуваат големи штети со ваквиот несовесен чин. Апелираме вандализмот да престане. Таа урбана опрема е купена со парите на граѓаните и не смее да се уништува“, рече Беќим Челебиу, директор на ЈП за паркинг и зеленило.

Наместо да се чува и ужива во просторот што е уреден како место за релаксација и и прошетка на гостиварци, поединци се однесуваат деструктивно. Инаку, со последната акција на претпријатието, во големиот парк беа поставени 42 клупи, и до секоја од нив има корпа за отпад.

Одговорните за одржување на паркот планираат како превентива да постават камери за видео надзор.

error: Content is protected !!