Училиштата и градинките во Гостивар ќе се дезинфицираат

Градинките и училиштата од денеска, па во наредните 14 дена ги затвораат вратите, со одлука на Влада, како мерка за превенција од ширење на коронавирус.

Во образованите установи во Општина Гостивар прекинот на наставата ќе се искористи за да се изврши дезинфекција во училишните згради и објектите на детските градинки.

„Согласно одлуката на Владата на Република Северна Македонија, настава нема да има 14 дена. Во текот на овој период, Општина Гостивар ќе изврши дезинфекција на сите простории во сите училишта, за непречено да продолжи наставата по 14 дена, ако така решат компетентните органи. Како институција, набавивме заштитни маски за сите вработени во општината кои имаат контакти со граѓаните, како и средства за дезинфекција во сите сектори и одделенија.“, информираше Валбон Лимани, шеф на кабинет на градоначалникот на ОпштинаГостивар

Владата вчера ги зајакна антикорона мерките. Забранети се масовни собири и настани со над 1.000 учесници, спортските натпревари ќе се играат без публика, воведена е задолжителна самоизолација на лицата кои доаѓаат од ризичните држави, во период од 14 дена, хигиената треба да биде на највисоко ниво итн.

И од гостиварската локална власт упатија повеќе препораки до граѓаните.  

„Им препорачуваме на граѓаните, да ја одржуваат личната и колективната хигиена, да избегнуваат контакти и непотребни излегувања од дома, а оние кои патувале во ризичните земји да бидат во самоизолација и ако забележат симптоми, да се јават во здравствените институции“, нагласи Лимани.

error: Content is protected !!