ФК Тетекс: Ново раководство и нов Стручен штаб

Фудбалскиот клуб Тетекс од Тетово зимската пауза ја искористи да назначи ново раководство. Во новиот Управниот одбор останаа дел од членовите од претходното раководство, но вклучени се и неколку стопанственици од Тетово, како и неколку познати фудбалски имиња.

Новото раководство на ФК Тетекс:
Војо Тофиловски – Претседател
Александар Трифуновски – Потпретседател
Борче Мирчевски – Технички секретар
Стојмир Урошевиќ – Спортски директор
Мирче Блажевски – Координатор
Зоран Трпковски – Комесар за безбедност

Новиот Управен одбор на првата седница донесе одлука да се постави нов Стручен штаб, со кој клубот ќе се обиде да избори пласман во повисок ранг. Оваа одлука значи и дека Ѓорѓи Тодоровски не е повеќе тренер на Тетекс.

Нов тренер ќе биде Ивица Јованоски – Ике, а ќе му помага Рахим Мемети. Амбициите на клубот остануваат исти, а тоа е пласман во 2. лига. Веќе го доведовме и првото засилување, Леон Најдовски, кој се враќа во нашиот клуб од прилепска Победа. – изјави Мирче Блажевски, Координарот на ФК Тетекс.

Новото раководство се соочува со стари проблеми. Истакнуваат дека најголем проблем бил реализацијата на ваучерот од Агенцијата за Млади и Спорт, но и спортската инфраструктура во градот.

Добивме ваучер со солидна сума од Агенцијата за Млади и Спорт, но не наидовме на разбирање од стопанствениците. Реализиравме само дел од стредствата. Друг проблем е инфраструктурата, немаме терени каде да тренираме. – рече Мирче Блажевски, Координатор на ФК Тетекс.

Фудбалскиот клуб Тетекс есенскиот дел во 3-тата лига Запад го заврши на втората позиција со заостанување од 4 бодови позади лидерот Беса од Добри Дол.

error: Content is protected !!