Црвениот крст Гостивар достави над 1.200 хуманитарни пакети

Хуманитарните организации на гостиварска територија периодов кога владее вонредна состојба поради коронавирусот, секојдневно се активни на терен. Општинската организација на Црвениот Крст изминативе две недели достави над 1.200 пакети со храна и средстава за хигиена на социјално загрозени семејства во општините Гостивар, Врапчиште и Маврово Ростуше. Пактетите се обезбедени како донации од локалните компании и граѓани поединци. Црвениот Крст има и мобилни тимови за достава на лекови и неопходни продукти на старите и болни лица.

„На терен имаме два мобилни тима, кои до домовите им ги носат потребните лекови, храна и друго на стари, изнемоштени и болни лица. Тимовите ќе бидат активни и за време на полициски час и во викендот додека трае карантинот“, рече Мерита Алили, секретар на Црвениот Крст.

Од почетокот на кризата во Гостивар беше формирано посебен Совет, кој ги координира  активностите на хуманитарните организации и донаторите. Од координативниот Совет нагласуваат дека е особено важно, доставувањето на хуманитарните пакети да се одвива на безбеден начин, за да се намали ризик од ширење на вирусот.

„Организациите кои делуваат на ова поле мора да ја сфатат важноста за почитување на стандардите при доставување на хуманитарна помош. Недозволиво е никој тоа да го прави своеглаво, неопходно е целиот процес да се одвива под услови кои се безбедни и за тие што ги носат и за семејствата кои ги примаат пакетите“, рече Љулзим Хазири, претседател на Советот.

Следната недела Координативниот совет ќе одржи состанок со организациите на кој ќе ги потсети на правилата и мерките кои треба да ги почитуваат при работа на терен.

error: Content is protected !!