Шести протест против поскапувањето на струјата во Гостивар

Во Гостивар по шести пат се организираше протест против зголемувањето на цената на електричната енергија. Протестниот марш овојпат започна од пред објектот на ЕВН, преку булеварот „Браќа Ѓиноски“ до зградата на претставништвото на ЕЛЕМ, ХЕЦ „Маврово“.

Покрај веќе познатите барања – да се поништи одлуката за поскапување на струјата, цената да се намали и да се распушти Регулаторната комисија за енергетика, од организацискиот одбор нагласија дека е потребно да се изнајде начин да им се простат долговите за струја на социјалните случаи.

„Ние како гостиварци до сме плаќале и паушал фактури за електрична енергија, кои ни ги доставиле од ЕВН и не сме поднесувале жалби. Сме биле многу толерантни и во случаи кога поради висок напон на електрична енергија ни прегорувале апарати. Од Регулаторната комисија за енергетика не се воопшто сериозни и се потсмеваат со нас. Ние денес ги повторуваме барањата до РКЕ и Владата, да го сфатат ова посериозно и да седнеме да разговараме за да одлучиме како што е најдобро. Во спротивно, не ни преостанува ништо друго освен да пристапиме кон граѓанска непослушност!“, беше речено на протестот во организација на навивачката група Кастриоти.

Протестот помина мирно. Симболично, на полициските службеници кои го обезбедуваа објектот на ЕЛЕМ, дечиња им подарија цвеќе.

error: Content is protected !!