Што претставува вонредната состојба од правен аспект?

Заради пандемијата со коронавирусот, во земјава за прв пат се воведе вонредна состојба. Претседателот Пендаровски прогласи вонредна состојба два пати по 30 дена и една по 14 дена, која треба да заврши на 30 мај. Што од правен аспект, претставува вонредната состојба? На оваа тема зборува долгогодишниот адвокат и правник, Александар Симјаноски.

„Вонредната состојба може да трае најмногу 30 дена. Кај нас имаше специфична ситуација, бидејќи таа одлука ја носи Собранието, но бидејќи сега имаме техничка влада, одлуката ја донесе претседателот на државата. Не може да се продолжи, но може да се носи нова одлука за вонредна состојба“, вели Симјаноски.

Мандатот на пратениците, претседателот, Владата и судиите на Управен суд се продолжува, вели Симјаноски. Владата е онаа која може да носи уредби со законска сила за време на вонредната состојба.

„Одлуките ги носи Владата како уредби со законска сила. Надлежноста ја има Владата за време на вонредната состојба, полесно да носи брзи одлуки за справување со одредената ситуација“, вели Симјаноски.

Иако не е експерт за уставно право, Симјаноски смета дека ограничување на движењето на граѓаните може да има и без вонредна состојба, зошто во уставот стои дека слободата на движење може да се ограничи со закон кога е тоа потребно за заштита на безбедноста на државата, водење на кривична постапка или заштита на здравјето на луѓето.

error: Content is protected !!