Ѓока: Квалитетно се засиливме

Фудбалерите на Шкендија веќе 10-тина дена активно се подготвуваат за продолжението од прволигашката сезона. Тие тренираат на терените во Тетово и тетовско, а така ќе биде се до 22-ри месецов кога екипата ќе замине на подготовки во турскиот туристички центар Анталија. Од клубот си заминаа 5 фудбалери, додека пристигнаа 4. Тренерот Ернест Ѓока е задоволен од досега сработеното, но и од ангажманот на Далку, Ахмеди, Нето и Кривак, од кои се очекува да го подигнат нивото на играта на Шкендија.

„Внимателно ги селектиравме новите играчи и верувам дека со нив ќе бидеме посилни во пролетниот дел. Екипата има победнички менталитет и на секој натпревар размислува само на победа. Можевме да донесеме уште нови фудбалери, но мислам дека ја исполнивме целта и донесовме квалитетни фудбалери на оние позиции каде што ни беа потребни. Задоволен сум од досегашниот тек на подготовките, а главниот дел ќе следува во Анталија, каде ќе одиграме и неколку контролни натпревари. Се надевам дека на пролет ќе ја намалиме предноста на Вардар и на крајот ќе завршиме на првото место“ – ни изјави тренерот на ФК Шкендија, Ернест Ѓока.

Екипата на Шкендија есенскиот дел од првенството го заврши на втората позиција на табелата со заостанување од 8 бодови позади лидерот Вардар.

error: Content is protected !!