50 до 60% од брзите ковид тестови во Гостивар со позитивен резултат

Во гостиварскиот регион, како и во поголемиот дел од земјава ширењето на коронавирусот периодов не стивнува. Матичните лекари бараат термин повеќе за брзи тестови, за пациенти коишто развиваат симптоми на ковид. Ваквите тестови се вршат во Лабараторијата на Здравствениот дом, од каде велат дека динамиката на работа е тројно зголемена. Дневно на тестирање доѓаат и до 35 лица, а процентот на позитивни резултати е висок.   

„Во последните три недели драстично е зголемен бројот на пациенти кои доаѓаат за брзи тестови. Ако во февруари имавме 10 до максимум 15 пациенти дневно, сега таа бројка се движи од 25, па се до 35 лица. Позитивни се 50 до 60% од тестовите“, вели д-р Абдулкадар Алији, раководител на Лабараторија Здравствен дом.

Брзите антигенски тестови во Гостивар беа воведени во втората половина на ноември лани. Тестирањето се спроведува во посебни термини определени само за таа намена, а целата процедура од земање брис до резултат трае 30 минути. Доктор Алији вели дека за сега, има доволни количини на тестови да се покријат потребите.

Од почетокот на пандемијата во општините Гостивар, Врапчиште и М.Ростуше потврдени се вкупно 4.714 случаи на коронавирус. Според последните податоци од Министерството за здравство бројот на активно болни моментално изнесува 514.